| Heathcote William Garrod, comp. (1878–1960). The Oxford Book of Latin Verse. 1912. |
| |
| Magic Waters in the Garden of Cicero’s Villa |
| | | M. Tullius Laurea (fl. 40 B.C.) |
| |
| |
| QVO tua, Romanae uindex clarissime linguae, | |
| silua loco melius surgere iussa uiret | |
| atque Academiae celebratam nomine uillam | |
| nunc reparat cultu sub potiore Vetus, | |
| hoc etiam apparent lymphae non ante repertae, | 5 |
| languida quae infuso lumina rore leuant. | |
| nimirum locus ipse sui Ciceronis honori | |
| hoc dedit, hac fontes cum patefecit ope, | |
| ut, quoniam totum legitur sine fine per orbem, | |
| sint plures oculis quae medeantur aquae. | 10 |
| |
|
|
|
